Запленети 4 тона апчиња и гел за потенција во вредност од 41,7 милион денари ризични за здравјето на граѓаните

Спречена нелегална трговија на 4 тона апчиња и гел за орална употреба за потенција во вредност од 41,7 милион денари ризични за здравјето на граѓаните откако царински инспектори од Секторот за контрола и истраги при детален преглед на стоката утврдија дека фирмата што ja внела стоката во државата нема важечко решение за вршење промет на големо со лекови и медицински средства.

Воедно, стоката е лек што не е регистриран во Регистарот на лекови, што го води Агенцијата за лекови и медицински средства на Република Северна Македонија и поинаку е декларирана, извести Царинската управа.

„Поради постоење сомневање дека пријавениот сторил кривично дело за нелегална трговија, што е казниво по член 277 од Кривичниот законик, стоката е запленета, а против правното лице ќе биде поднесена соодветна кривична пријава до Основно јавно обвинителство Скопје.

Запленети се 48 илјади кутии „орал џели“, односно 100 мл гел за орална употреба „камагра“, 10.530 ленти со 100 мг таблети „камагра“ и 7.000 кутии со 100 мг и 150 мг таблети „ценфорце“.

Царинската управа го штити здравјето на граѓаните преку обезбедување сигурен и безбеден трговски синџир на лекови спречувајќи трговија со лекови во државата што не се одобрени од Агенцијата за лекови“, се наведува во соопштението на Царинската управа.

Од таму додаваат дека ќе продолжат да дејствуваат против нелегална трговија, која претставува опасност за граѓаните.

„Притоа сме во тесна соработка со Агенцијата за лекови и медицински средства, како и со другите гранични институции со цел зајакнување на граничната безбедност“, додаваат од Царинската управа.