Партија на пензионери: Посветени сме на системско решавање на барањата на пензионерите

„Партијата на пензионерите (ПП) е единствена политичка партија што во својата суштина ги застапува пензионерите во сите сегменти на општественото дејствување, творење и живеење, преку својата програма и повелба, каде што, покрај социјалните, државните и развојните цели, главна целна група се пензионерите и состојбата во пензионерското организирање и живеење“.

Од оваа партија велат дека со големо внимание ги следат сите протести на пензионерите, а особено нивните барања и врз основа на извршените анализи гледа дека:

„Партијата на пензионерите ги има апсолвирано сите барања и иницијативи на иницијативниот одбор на протестите и тие веќе ги има опфатено во својата програма и платформа за работа и во своето јавно дејствување преку парламентот има поднесено повеќе барања за нивно системско решавање, што може да се види од досегашните јавни настапувања на претседателот на ПП.

Партијата на пензионери исто така не застана јавно да ги поддржи демонстрантите бидејќи иницијативниот одбор на протестите јавно се изјасни дека во протестите не сакаат да се инволвираат политичките партии, иако за волја на вистината во тој ист иницијативен одбор на протестите се наоѓаат партиски луѓе, кои се претставници на антиевроскиот блок во Македонија и чии политички партии јавно ги подржуваат протестите. Тоа се истите политички партии, кои за време на своето владеење го доведоа до колапс Пензискиот фонд и целокупниот пензиски систем во државата, а сега нудат исти решенија за проблемите што сами ги створија, како, на пример, зголемување на пензиите за 600 денари, и тоа еднаш во годината.

Партијата на пензионерите преку учеството во владината коалиција промовира политики што имаат цел стабилен пензиски систем и достоинствени пензии за пензионерите уважувајќи ги иницијативите што доаѓаат од пензионерите, а се однесуваат на подобрување на нивниот материјален статус и економска сигурност.

Партијата на пензионерите своите активности ги насочува на изнаоѓање најповолно решение за подобрување на материјалниот статус на корисниците на минимални пензии, без притоа да се загрози стабилноста на пензискиот систем и редовната исплата на сите пензии.

Партијата на пензионерите во рамките на коалицијата неколкупати иницира донесување закон за минимална пензија и во таа смисла има подготвено предлог-закон за минимална пензија и предлог на мерки за солидарна финансиска поддршка за пензионерите до просечна пензија.

Партијата на пензионерите исто така се залага за проширување на позитивната листа на лекови и неплаќање партиципација на највозрасните и на најнемоќните пензионери со помали пензии од просечната“.

Од таму додаваат дека се и секогаш ќе бидат со пензионерите штитејќи ги нивните интереси, а не интересите на тие што манипулираат со изборите во некои здруженија на пензионери и кои нетранспарентно ги трошат финансиските средства од членарината на сите, а особено на социјално загрозените пензионери.

„Секој добронамерен, чесен и способен човек е добредојден да ни се придружи со заедничко дејствување го направиме животот поубав во нашата ни единствена татковина МАКЕДОНИЈА за сите вклучувајќи ги и пензионерите. Затоа, придружете се и поддржете ја Партијата на пензионерите да имаме повеќе претставници во законодавниот дом и во извршната власт за поуспешно да се избориме за програмските цели и со самото тоа за целокупната пензионерска популација во општеството.

Правната служба на Партијата на пензионерите секогаш стои на располагање на сите пензионери за давање бесплатна правна помош“, се додава во соопштението на Партијата на пензионерите.