До среда ќе има одлука на Антикорупциска дали кандидатите за судии и обвинители може да бидат тестирани додека трае кампањата

Откако изборниот штаб на претседателскиот кандидат Гордана Силјановска Давкова, упати приговор до Антикорупциската комисија, дека академици за идни судии и обвинители ќе бидат тестирани во предизборниот период, Антикорупциска има пет дена да одговори во итна процедура. Штабот на Силјановска тврди дека станува збор за вработување на нови судии и обвинители со што има изборно влијание, додека од Академијата за судии и јавни обвинители велат дека тестирањето е редовно, а тие што ќе го поминат ќе бидат вработени после изборите.

Во имињата на новите академци има и кандидати со политички врски со власта, обвинуваше опозицијата наведувајќи ги имињата на Мики Крстев, заменик министер за локална самоуправа, членот на ДИК од ДУИ Дитмире Шеху и други кандидати.

Со конкурсот и тестирањето на кандидатите за судии и обвинители на Академијата се кршат изборните правила и законот затоа што на тој начин се овозможува вработување на идни судии и обвинители со постапки во изборен период, смета изборниот штаб на кандидатката на опозицијата за претседател, Гордана Силјановска Давкова.

Академијата за судии и јавни обвинители негира дека се врши влијание во изборниот процес, зашто сега се спроведуваат фази од приемниот испит а не засновање на работен однос. Оттаму истакнуваат дека и во 2015 година Антикорупциска дозволила да се одвива процесот на тестирање, а вработувањата се случиле две години подоцна, во 2017.

Најдоцна до среда ќе имаме јавна седница за да донесеме одлука, изјави претседателката на Антикорупциска комисија, Татјана Димитровска за Телма.