Галичка свадба од 11 до 13 јули, објавен конкурсот за пријавување на заинтересирани парови

Месна заедница Галичник објавува дека започнуваат подготовките за Галичка свадба 2025!

-Овогодинешната Галичка свадба ќе се одржи традиционално на празничниот петровденски викенд од 11 до 13 јули во Галичник. Уште еднаш ќе ги отвориме ковчезите за чеиз, ќе се дотераме во свечено свадбарско руво, ќе си накитиме бајрак и со три пушки ќе ја најавиме радоста на наште младенци кои својата љубов ќе закитат со венчавка во Галичник. И оваа година доследни на традицијата, ќе ги спасиме од заборав нашите вековни обичаи и со свадбени поворки, песна и ора и ќе направиме уште една незаборавна Галичка свадба, велат од месната задница.

Сите заинтересирани парови кои сакаат да ја крунисаат својата љубов на Петровден и да дадат завет пред Бога да се пријават најдоцна до 20.04.2025 година.

Потребно е да испратите е-пошта на [email protected] со наслов „За избор на зет и невеста“ и да раскажете зошто токму вие сте вистинскиот пар.

Предност ќе имаат оние кои:

– Имаат потекло од Галичник (двајцата или еден од нив)
– Веќе биле дел од Галичката свадба во друга улога
– Се активни членови на месната заедница
– Парови за кои ова ќе биде прв црковен брак

Одлуката за избор на зет и невеста ќе биде објавена најдоцна до 31.05.2025 година на официјалната веб-страница и Facebook профилот на МЗ Галичник.