Сали: Иновациите и човечкиот капитал се клуч за економски напредок на државата

Научниот саем 2026 година, организиран од Меѓународните училишта „Маариф“ во Тетово, денеска собра голем број ученици, наставници и гости од јавниот живот, меѓу кои и првиот заменик на Претседателот на Владата и министер за европски прашања, Беким Сали.

Во рамки на настанот, Сали порача дека иднината на економијата сè појасно се гради врз знаење, иновации и креативност, нагласувајќи дека токму младите се клучниот двигател на тие процеси. Тој посочи дека современите општества напредуваат само кога идеите добиваат практична примена и создаваат реална вредност.

„Човечкиот капитал денес е најсилната инвестиција на секоја држава. Кога младите добиваат простор да истражуваат и да создаваат, тогаш се гради стабилна основа за долгорочен развој,“ порача Сали пред присутните.

Тој го оцени саемот како важна платформа која ја поврзува образовната сфера со економијата, овозможувајќи им на младите да ги претстават своите проекти и идеи пред поширока јавност и потенцијални партнери од бизнис секторот.

Според него, ваквите иницијативи се во директна линија со државните приоритети за поттикнување на иновациите и зајакнување на младинскиот потенцијал како дел од пошироката европска развојна агенда.

Настанот заврши со порака на поддршка кон организаторите и охрабрување за учесниците, при што Сали им посака успех во понатамошниот развој на нивните научни и креативни проекти.