Никола Тасев во својата колумна: Филипче ќе пишува писмо до Брисел “Ако Мицковски ве игнорира, јас ќе ве слушам за се”
Колумната на новинарот Никола Тасев отвора сериозна дебата околу најавата на лидерот на СДСМ, Венко Филипче, да испрати писмо до Европската Унија, во кое ќе алармира за, како што тврди, застојот на евроинтегративниот процес.
Во текстот, Тасев сатирично ја формулира суштината на ваквиот потег преку пораката: „Почитувани ЕУ-комесари, со писмово сакам да ви кажам – овој Мицкоски не ве слуша, а јас ќе послушам сè што ќе побарате од мене“.
Тој додава дека ваквиот пристап остава впечаток на политичко позиционирање пред меѓународната заедница, наместо градење на внатрешен консензус, нагласувајќи дека „ако зборуваме за национално единство, тогаш тоа се гради дома, а не преку писма до Брисел“.
Во колумната се поставува и дилемата за усогласеноста на ваквите чекори со јавното мислење, при што се потенцира дека „голем дел од граѓаните имаат резерви кон уставните измени и преговарачката рамка“, што ја прави ваквата комуникација дополнително чувствителна.
Тасев во текстот укажува и дека ваквите пораки може да се толкуваат како сигнал дека опозицијата се нуди како поусогласен партнер со европските институции, истакнувајќи дека „наместо аргументирана позиција, се испраќа порака на безусловна подготвеност за прифаќање на барањата“.
Во заклучокот, колумната отвора пошироко прашање – дали ваквиот пристап придонесува за европската перспектива на земјата или ја продлабочува политичката поларизација, оставајќи дилема околу вистинската стратегија за евроинтеграциите.