Општини со најмала и најголема излезеност до 15 часот

13

Иако излезеноста до 15 часот, генерално, е повисока споредено со онаа од последните избори кои се одржаа на територијата на целата земја, првиот круг од локалните избори во 2021 година, во општините каде денеска се излезени најмал број избирачи, во 2021 имало поголем одзив. Зголемена е и разликата меѓу општината со највисок и со најнизок одзив во 15 часот, споредено со првиот круг од локалните избори во 2021 година

Пласница, според податоците за излезноста до 15 часот на првиот круг од претседателските избори, е општината со најниска излезност. Само 12,57 проценти од запишаните избирачи, на обработени 99,91 од податоците, решиле да го остварат гласачкото право.

И на последните избори кои се одржаа на територијата на цела држава, првиот круг на локалните во 2021 година, Пласница имаше една од најниските излезености на крајот на изборниот ден. Но, барем во 15 часот, таа не беше меѓу 10-те општини со најнизок одзив, што значи дека имала повисок процент на излезеност.

И не е само Пласница. Во Центар Жупа, како што покажува графиконот подолу, во 2021 година во 15 часот имало одзив од 19,1 отсто. Одзивот од 2021 е обележан со сина боја. А со портокалова е обележан одзивот на денешните претседателски избори кој изнесува 6 процентни поени помалку – само 13,11 отсто. Иако со помали разлики, слична е состојбата и во другите општини каде денеска има најниска излезеност – Маврово и Ростуше, Студеничани, Врапчиште… Во сите овие општини во 2021 година имало поголем одзив до 15 часот.

Од друга страна, ако се споредат бројките од општините каде на денешните избори има највисок одзив, се забележува дека, со мали исклучоци, одзивот е поголем од минатите избори (првиот круг од локалните во 2021 година).

На пример, во Крива Паланка одзивот на овие избори до 15 часот е повисок за околу 3 процентни поени. Во Демир Капија за 1 процентен поен. Во Пробиштип и за повеќе процентни поени, ако се знае дека оваа општина не била меѓу 15-те со највисок одзив до 15 часот во 2021 година, а 15-тата општина со највисок одзив тогаш имала 44,16%. Исклучок е Новаци, кој и на изборите во 2021 и сега има највисока излезеност, но сега е пониска за 1,5 процентни поени.

На крај, на минатите избори, јазот меѓу општината со највисок одзив во 15 часот (Новаци – 59,16 проценти) и општината со најнизок одзив (Центар Жупа – 19,1 отсто) изнесуваше околу 40 процентни поени.

На денешните избори, во 15 часот, јазот меѓу општината со највисок одзив во 15 часот (Новаци – 57,69 проценти) и општината со најнизок одзив (Пласница – 12,57 отсто) изнесува околу 45 процентни поени.

Може ќе Ви се допадне

Веб страницата користи *колачиња со цел да овозможи и креира подобро корисничко искуство за нашите посетители. Прифаќам Повеќе

Skip to content