Куновска без влакна на јазикот за Филипче и партијата
КАКО СДСМ ЌЕ ЗБОРУВА ЗА ЕУ И НАТО ВРЕДНОСТИ, КОГА ВЕНКО Е СПРЕМЕН ЗА ИСЕЛУВАЊЕ ВО ДУБАИ?
Софија Куновска без влакна на јазикот за златната виза на Венко Филипче во Дубаи.
„За Венко злато – за СДСМ р’ѓа! Пред некое време си ветив сама себеси дека нема да го критикувам овој СДСМ повеќе. Не дека сакам да го поштедам раководството, туку зошто ми е криво за обичните членови, кои навистина искрено и чесно трчаат за СДСМ, наивно верувајќи дека тоа сеуште е партија, а не ДООЕЛ Струмица Експрес. Арно ама скандалот со златната виза за Дубаи не се премолчува, бидејќи станува збор за тешка манипулација која ја навредува интелигенцијата до болка. Имено, согласно регулативите на ОАЕ, златна виза се добива со инвестиција од најмалку 550 000 американски долари или ако имаш валидна лиценца за работа во Дубаи. А за да добиеш валидна лиценца за работа во Дубаи има два неопходни кумулативни услови кои мора да се исполнат: прво, да ти го признаат факултетот, во случајов медицинските дипломи на Филипче, второ да имаш минимум 5 години стаж во ОАЕ во дејноста за која си квалификуван. Ова значи дека Венко Филипче не можел да добие златна виза заради преговори за работа во болница во Дубаи, како што се правда. Значи, лупингот на Венко од немам златна виза до имам – ама заради преговори за работа, а не заради инвестиции е манипулација која ја става на ачик неговата вистинска улога како претседател на СДСМ. Затоа, време е членството на партијата да ги постави вистинските прашања: Дали Венко го води СДСМ за да некогаш дојде на власт или партијата вака дизајнирана единствено служи за одбрана на нелегално стекнатиот имот во периодот 2017-2024? Со каков товар ќе влезат кандидатите на СДСМ на претстојните локални избори? Зарем на пример еден Мишко Ралев или некој друг интелектуалец ќе сака да прифати да се девалвира и да ја брани златната виза во кампањата за Скопје? Како понатаму овој СДСМ ќе зборува за ЕУ и НАТО вредности кога Венко е спремен за иселување во Дубаи? Како овој СДСМ ќе ја убеди јавноста дека искрено ги лови скандалите на ВМРО-ДПМНЕ и ЗНАМ, кога молчи за скандалите во својот врв? И конечно, пред да почнат партиските ботови на Бихакќа (кои се местат за кандидати за советници на првите три места) да ме обвинуваат за завери против СДСМ, да им порачам дека му прават ѓаволска услуга на Венко за што сигурно порано или подоцна ќе се срамат!“, напиша таа.