Во август летувале повеќе од 150.000 туристи! Колку заработија нашите хотелиери и угостители?

Над 762.000 ноќевања во трите езерски центри оствариле домашни и странски туристи. Само по тој основ нашите хотелиери и сместувачи инкасирале најмалку 25 милиони евра

Повеќе од 150.000 туристи во август примиле нашите три езерски туристички центри: Охрид, Струга, Дојран и по малку и Преспа, покажуваат официјалните податоци од најновиот статистички извештај на Државниот завод за статистика.

Иако нема прецизна евиденција по езерски центри, познато е дека повеќе од 70 отсто од сите гости ги апсорбирале и опслужиле хотелите, сместувалиштата и приватните капацитети на охридско-струшката ривиера. Дојран според тамошните туристички работници годинава во најголема мерка гостите и ноќевањата ги остварувал благодарение на транзитниот туризам претежно на веќе традиоционалните гости од соседна Србија кои ноќеваат на пропатување на одење и враќање од одмор во соседна Грција.

Вкупно годинава во август бројот на регистрирани домашни туристи во Орхид, Струга, Дојран и во помала мерка во Преспа изнесува 150.861 лице односни 4.866 гости вкупно во сите езерски летувалишта просечно дневно.

Од тоа речиси 100.000 гости се домашни туристи, а нешто повеќе од 51.000 лица се странци кои летувале или само ноќевале во нашите езерски центри.

Вкупниот број на остварени ноќевања изнесува над 762.000, а од нив 641.000 оствариле домашни односно македонски туристи. Странските ноќевања во август достигнале 121.000. Тоа значи дека во просек дневно нашите езерски туристички центри остварувале околу 24.600 ноќевања на домашни гости и уште 3.900 странци просечно секој ден ноќевале во нашите сместувачки капацитети во Дојран, Струга, Охрид и во Преспа.

Од извештајот на статистика вреди да се истакне дека Скопје во август го посетиле над 45.000 странски туристи. Тоа значи дека во најтоплото во август Скопје просечно дневно угостувал околу 1.460 странски туристи. Тие реализирале над 75.400 ноќевања што значи дека се задржувале во Скопје во просек на помалку од два дена.