Среде месец Мај ни се враќа зимата
Новата седмица која доаѓа носи драматична промена на временските услови низ целиот Европски континент, вклучувајќи го Балканот и Македонија. Според најавите, од северозапад кон регионот ќе се спушти значително постудена воздушна маса која ќе предизвика нагло заладување и температури далеку под просекот за месец мај.
Покрај големиот пад на температурите, се очекуваат и обилни врнежи од дожд, засилен и бурен ветер, како и локална појава на невреме проследено со грмежи. На одредени повисоки и планински места на Балканот можна е и појава на снег, додека во Алпскиот регион се очекуваат обилни снежни врнежи.
Метеоролошките карти покажуваат дека поголем дел од Европа и Балканот ќе бидат под влијание на нестабилна и многу посвежа воздушна маса, што ќе донесе изразена временска нестабилност во текот на следните денови.
Ваквата нагла промена на времето може негативно да влијае и врз здравјето на граѓаните, особено кај метеопатите и хронично болните лица, кај кои се можни главоболки, замор, проблеми со крвниот притисок и зголемена чувствителност.