Само свињите имаат светла иднина! Јаболка и грозје речиси и да нема, производството на домати преполовено, а исто е со овците и јагнињата, но и со производството на мед. Производството на млеко е намалено за 37 проценти, а во исто време откупот на говеда е 8 пати помал од лани. Земјоделците продавале ориз од стари реколти, а лозарите вино од залиха и затоа тука има раст на продажбата. Толку не ја бива работата што и откупот на ракија е преполовен…
Официјалните податоци за домашното производсто и откуп на земјоделски производи, најблаго речено се поразителни! Ова го покажуваат официјалните статистички податоци на Државниот завод за ревизија објавени деновиве.
Вредноста на откупот на земјоделски производи во периодот јули-септември изнесува 77,5 милиони евра. Во услови на раст на цените на цела храна вредноста на откупот е пониска за 20 милиони евра! Тоа значи дека толку многу е намалено производството на храна во услови на драстично зголемени цени што неминовен бил и пад на вкупниот обем на вредноста на откупот односно на продажбата на земјоделските производи.
Од каде да почнеме?
Секако е страшно. За летните месеци кога во ек е жетвата земјоделците предале во откуп вкупно 1.400 тони пченица и рж. Тоа е 35 отсто помалку од летните месеци лани. Продажбата на ориз е пак зголемена за 39 пати. И тоа само по себе е исклучок од трендот затоа што станува збор за продажба на залихи трупани со години заради демонивациската цена на оризот. Конечно и оризопроизводителите видоа „бел ден“ со енормното поскапување на цените на храната кое го повлече нагоре и оризот.
Во периодот јули-септември се откупени само 2.160 тони домати. Тоа е половина од откупот лани. За јаболките и грозјето е траорно да се зборува. Годината воопшто не им се погоди. Откупот на јаболки изнесува 130 тони и е 14 пати помал од истиот период лани. Гроздоберот годинава беше „само на снимки“. Затоа што количината откупено грозје е 14 пати помала од лани. Тоа во одредена мерка е компензирано со продажба на вино од залиха. Така продажбата на вино дошла до 78.500 хектолитри што е 50 отсто повече од претходната година. Откупот на ракија е на пола од лани и изнесува 5.000 хектолитри.
И пчелите годинава не работеа како што треба. Медарите од јули до септември предале 2,5 тони мед. Тоа е половина од предаденото лани. Затоа што пролетта беше влажна, а летото сушно. Дури и кај производството на печурки сме потфрлиле. Предадени се 157 тони за три месеци или 42 отсто помалку.
И кај сточниот фонд е страшно. Со исклучок на свињите затоа што за нив има светла иднина бидејќи нивниот откуп е удвоен во споредба со лани, а предадени се 2.750 тони жива мера.
Откупот на овци и јагниња е преполовен и од јули до септември се откупени само 27 тони. Кај говедата е пострашно. Нивниот откуп е намален за 8 пати од лани. Предадени се само 160 тони.
Производството на риба одамна не е одлика на македонското производство на храна. Но и тоа такво лани не било на ниво. Намалено е за 22 отсто до ниво од 27 тони за три месеци.
Како во вакви услови производството на млеко е намалено само за 36 отсто статистичкиот извештај нема одговор. Иако логика нема. Освен ако голема количина млеко или суровина не влегува од увоз.
Има ли кој да го вклучи алармот?
