ПРЕКИНАТ Конгресот на СДСМ – општинските организации побараа време за анализа на извештајот

Анализа на изборните резултати на претседателските и парламентарните избори 2024 година, врз основа на подготвен детален и обемен Извештај, се случуваше денеска на отчетниот Конгрес на СДСМ.

Претседателот на СДСМ Димитар Ковачевски ја образложи неговата одлука за повлекување од функцијата.

Генералниот секретар на СДСМ и шеф на изборниот штаб, Миле Зечевиќ Вардарски го презентираше деталниот Извештај за парламентарните и претседателските избори 2024 година по што беше отворена дискусија во однос на Извештајот, во којшто се содржани и анализите на изборниот резултат.

– Поради обемниот материјал на Извештајот кој опфаќа политички, оперативен и аналитички дел, општинските организации на СДСМ побараа време за да го анализираат, да се произнесат и да дадат свој придонес, на ниво на општински изборни штабови и на ниво на општински организации во конечната верзија на Извештајот за парламентарните и претседателските избори 2024 година.

Предлогот беше поддржан од мнозинството присутни делегати со што се одлучи Конгресот да прекине со работа, да се даде време општинските организации да го анализираат Извештајот, да се произнесат и дадат свој придонес во конечната верзија со забелешки, сугестии и заклучоци, информираат од СДСМ.

Конгресот на СДСМ ќе продолжи откако општинските организации ќе се произнесат за Извештајот за претседателските и парламентарните избори, а терминот дополнително ќе биде утврден.