Српските власти со најава – денеска иницијативен состанок на движење за народ и држава

Српскиот претседател Александар Вучиќ најави дека денеска ќе се одржи иницијативен состанок за движењето и додаде дека на состанокот ќе присуствуваат десетина лица, а ќе започнат сите активности поврзани со неговото формирање, јави дописникот на МИА од Белград.

„Ќе има мал иницијативен комитет на движењето, околу десет луѓе, а сите активности ќе почнат в недела. Во наредните денови и недели ќе подготвиме се – од името на движењето, што ќе биде здружение на граѓани, до симболите, ознаките и се друго, до целокупната програма“, изјави Вучиќ синоќа по дводневната посета на Топличкиот и Јабланичкиот округ.

Како што наведе тој, засега во своевидна преамбула и задача на иницијативниот комитет има само основни точки од она што очекуваат за иднината на Србија.

„Очекувам голем број српски граѓани да се приклучат на ова движење“, рече Вучиќ, додавајќи дека средбата ќе се одржи во 11 или 12 часот.

Српскиот премиер во технички мандат, Милош Вучевиќ најави во петокот дека првиот состанок за движењето за народот и државата ќе се одржи викендов и додаде дека прашање на договор е дали големиот митинг ќе се одржи на 28 март или во април. Вучевиќ рече дека на средбата за движењето треба да се разговара за сите активности до Видовден (28 Јуни) и официјалното формирање на движењето.