ОД 15 ДЕКЕМВРИ ДО 15 ЈАНУАРИ Над 600 производи ќе бидат на попуст

Од 15 декември до 15 јануари повеќе од 650 производи ќе поевтинат за 10 и повеќе проценти во рамки на таканаречената новогодишна кошничка.

Производите кои ќе поевтинат ги понудиле производителите и трговците, како резултат на анализата кои производи најчесто се купуваат за време на Нова година и другите празници.

Ова денеска со консензус го договорија владата, трговците, дистрибутерите и синдикатите и стопанските комори, информираа премиерот Христијан Мицкоски и министерот за економија Бесар Дурмиши.

Мицкоски рече дека ова е прв пат да се донесе мерка без притисок од страна на Владата, бидејќи е понудена од компаниите, дистрибутерите и трговците и е донесена со консензус на сите заинтересираните страни.

Во овој период нема да има казни бидејќи намалувањето на цените на овие производи е предлог на компаниите. Контролата ќе ја вршат граѓаните.

– Направивме нешто што можеби досега никогаш не е направено – сите заедно разговаравме извесен период и за време на тие разговори дојдовме до компромис. Сите се согласивме во периодот од 15 декември до 15 јануари цените на повеќе од 600 артикли да бидат намалени и брендирани со налепници на кои ќе пишува „Помалку трошоци, повеќе за тебе, се грижиме“ – рече Мицкоски.

Во акцијата за почеток учествуваат 60 компании, но е отворена за учество и на други компании и за други производи се до 15 јануари.

Производите кои ќе имаат намалена цена за 10% , во маркетите ќе бидат изложени со ознака „помалку трошоци, повеќе за тебе“ и заедно со компаниите се објавени на страницата „mojakosnica.mk“.

Мицкоски рече дека не очекува компаниите кои учествуваат во акцијата да ги зголемат цените пред почеток а акцијата, а потоа да ги намалат за договорените 10%, но најави дека државниот пазарен инспекторат ќе ги провери сегашните цени со цените кои ќе бидат објавени за време на акцијата. Но, доколку има манипулации ќе бидат опоменувани трговците, доколку не постапат етички трговците ќе се употребат други алатки.

Министерот за економија рече дека новогодишната кошничката се договарала повеќе од еден месец, а производите со намалени цени ќе бидат објавени на веб страницата.

– Опфатени се 650 производи предложени од производители, дистрибутерите и трговци. Опфатени се производи кои се трошат за овие празници меѓу кои леб, печива, житарки, месо, свежо и замрзнато овошје и зеленчук…- рече Дурмиши.