Николоски: Законски измени за поригорозна контрола и стабилен правен систем

Вицепремиерот и министер за транспорт Александар Николоски, во емисијата „Тема на денот“ на Сител телевизија потенцираше дека се неопходни значајни законски измени со цел да се осигура почитување на законот и да се спречат потенцијалните несакани последици.

Николоски истакна дека основната цел не е да санкционираат субјекти, туку да се воспостави стабилен и функционален правен систем. Тој додаде дека оваа ситуација треба да биде поука за иднината и дека Владата е посветена на преземање на решителни чекори за подобрување на состојбите, притоа нагласувајќи дека неопходно е брзо донесување на промени.

Министерот Николоски објасни дека според Законот за угостителска дејност, проверката на потребните документи за објектите, како што е кабаре, е оставена на совеста на подносителите и службениците во Министерството за економија. Тој додаде дека како резултат на тоа, се случил недостаток на соодветна контрола, што довело до сегашните проблеми.

,,Тоа е така во Законот за угостителска дејност, каде што практично е оставено на совеста на оној кој што поднесува и оставено е на службениците во рамки на службениците во Министерството за економија, да ги проверуваат тие потребни документи кои што треба да ги има еден објект, во случајов да се нарекува кабаре, и на крај имавме резултат како што имавме“, истакна Николоски.

Тој потенцираше дека покрај засилената проверка на лиценците и овластувањата, потребни се законски измени кои ќе ја преобликуваат целокупната регулатива и ќе воведат нови, појасни и поригорозни правила на игра. Николоски додаде дека овие измени ќе бидат насочени кон зајакнување на контролните механизми и ќе ја направат контролата поефикасна, со цел да се обезбеди целосно почитување на законите и спречување на несаканите последици во иднина.

,,Покрај проверка на лиценците на овластувањата, секако дека се потребни законски измени кои што на поинаков начин ќе ја моделираат целата материја, ќе воведат поинакви правила на игра и ќе ги зајакнат механизмите на контрола, и ќе бидат порестриктивни. Можеби дел од бизнисот ќе реагира, но не е намерата било кој да се казни, туку намерата е да се натераат сите да работат во рамки на законот и да го почитуваат законот, како би се избегнувале несакани последици во иднина“, изјави министерот Николоски.

Тој посочи дека оваа ситуација треба да послужи како голема поука за да се избегнат слични проблеми во иднина. Тој изрази уверување дека Владата вложува максимални напори за да ги коригира состојбите и да ги подобри механизмите на контрола. Како што нагласи тој, ова е наследена ситуација од последните 30 години, која не може да се реши преку ноќ, но постои силна мотивација кај сите инволвирани да се направат потребните промени.

Според него, важно е да се дејствува брзо и решително, со цел да се постигне напредок и да се создаде стабилна и правна основа за иднината.

,-Ова треба да е голема поука да не ни се повторуваат вакви работи во иднина, и како Влада правиме максимум што е во наша можност да ги корегириаме овие состојби. Ова е наследена ситуација од изминатите 30 години, не оди лесно, но она што го гледаме , гледаме мотив кај сите да се менува и мислам дека треба да го направиме тоа час поскоро“, заклучи министерот Николоски.