Мултимедијалниот проект „Генеза на хроничната мистерија“ на уметникот Емил Солески во Прилеп

„Генеза на хроничната мистерија“ е насловот на мултимедијалниот проект од уметникот Емил Солески што ќе биде претставен вечерва во 20 часот во Центарот за култура „Марко Цепенков“ во Прилеп. Тој ќе се претстави со триптих – алегорија за губењето на идентитетот.

Во време кога надминуваме одредени предрасуди и се бориме со стереотипи, разгорува распаднатото огниште, се занишува празната лулка, а паланзата, и без тег ќе измери нешто, потамина ако треба. Ликовно-просторниот експеримент е фантастична дијагонала на „архаичниот“ и дигиталниот идентитет – велат организаторите.

Концептот предвидува просторна видеоинтервенција и тарнсформација, барање нова визија на веќе виден простор. Триптихот ќе се формира со проекција на видео-аудио материјал врз просторно поставени три архаични форми, ликовни метафори: распаднато огниште – ликовна метафора за празен дом, градови, села, земја; кантар, паланза без тег – ликовна метафора за строгото критичко оценување на немањето рамнотежа во природните, општествените, социјалните односи, принципи, тежнеења, закони; празна лулашка – ликовна метафора за негрижата и изгубеното наследство, природно, национално, културно-историско.