Граѓаните утре ќе им кажат НЕ на маркетите поради високите цени (ВИДЕО)
Граѓаните утре ќе им кажат НЕ на маркетите поради високите цени. По повиците на социјалните мрежи да не се пазарува во маркетите, КУРИР излезе на терен и ги праша граѓаните дали ќе го поддржат утрешниот бојкот. Тие едногласни: ДА за бојкот!
-Го оправдувам и ќе бојкотирам. Го поддржувам! Заедно со инспекциите и надлежните ќе се постигне ефект…, се само дел од коментарите на граѓаните.
Надлежните институции најавуваат ригорозни контроли во маркетите и трговските објекти и итна реакција.
Премиерот Христијан Мицкоски најави одлучна, одговорна и транспарентна акција во борбата против неправедните трговски практики и злоупотреби кои директно влијаат на животниот стандард.
– Во духот на солидарноста, го разбирам повикот за бојкот на маркетите, како чин на граѓански отпор против монополското однесување и општествената неодговорност на поединечни трговци. Имам јасни сознанија дека одредени субјекти на шпекулативен начин се обидуваат да генерираат огромни профити на грбот на граѓаните. Ова е неприфатливо и нема да биде толерирано!, вели премиерот.
Ги повика сите надлежни институции, но и трговците, да се однесуваат со максимална одговорност и почит кон народот.
– Ќе инсистирам на транспарентност и ригорозни казни за сите кои ќе се утврди дека го изигруваат законот и ги злоупотребуваат граѓаните и добавувачите. Заедно ќе се спротивставиме на сите кои мислат дека ќе се богатат на наша сметка. Ќе се справиме со овој проблем и ќе направиме сè што е во наша моќ за да го заштитиме животниот стандард на сите наши граѓани! Во исто време, ќе продолжиме и со субвенционирање на најпогодените категории на граѓани за дополнително да ги минимизираме негативните ефекти од растот на цените, наведе Мицкоски.
Јавниот повик за бојкот е поддржан и од Организацијата на потрошувачи на Македонија, како и од занаетчиската комора која ги повикува граѓаните да направат поправеден избор и да пазарат кај малите занаетчии, информираа денеска од ЗКРСМ.
Поддршка за бојкотот дадоа и двете најголеми македонски партии – ВМРО-ДПМНЕ и СДСМ.
И Партијата на пензионери вчера излезе со соопштение во кое ги повика своите членови да дадат поддршка на најавената акција за бојкот.