Стотици про-Путиновски демонстранти кои се противат на бугарската поддршка за Украина во војната против Русија се собраа пред зградата на парламентот веејќи бугарски и руски знамиња, свирејќи и барајќи предвремени избори во земјата која имаше пет во последните две години.
Многумина извикуваа „оставка“, а полицајците ги заштитија владините згради, вклучително и Министерството за одбрана, кон кое некои демонстранти фрлаа со јајца. Бугарија, која испраќа оружје во Украина, минатата недела ја укина забраната за увоз на жито од Украина.
„Бугарите не сакаат да учествуваат во војната меѓу Русија и Украина, ние сакаме да бидеме неутрална земја“, рече Нели Тјулекова (60). Таа додаде дека Бугарите се против испраќање оружје во Украина бидејќи тоа „поттикнува војна“.
Некои демонстранти носеа транспаренти на кои пишуваше „Американските бази надвор! Бугарија е зона на мирот“, што се однесува на отворањето на нова воена база на НАТО во земјата.
„Последната инструкција од господарот на Бугарија, САД е Бугарија да изгради нова воена база“, изјави Костадин Костадинов, лидерот на Обнова. „НАТО надвор!“ додаде тој.
Демонстрантите го завршија собирот пред споменикот на советската армија, во судир со полицајците кои од безбедносни причини се обидоа да ги спречат да му се приближат бидејќи тој е под скелиња, откако владата одлучи да го отстрани споменикот.
Бугарија денеска протера еден руски и двајца белоруски државјани и им забрани влез во земјата во следните пет години по налог на Државната агенција за национална безбедност, јавуваат локалните медиуми.
