На ЕУ ѝ снемуваат санкции

Неуспехот на земјите-членки на ЕУ да се договорат за руското ембарго за нафта покажува дека Унијата ги достигнува границите на својата способност да воведе финансиски санкции кон Москва, изјави дипломат на ЕУ за Еурактив неделава.

Ако имаше таков хаос со руската нафта, замислете што ќе се случи со предлогот за забрана на гасот – изјави неименуваниот дипломат, по состанокот на министрите за надворешни работи на ЕУ во понеделникот.

Седмиот пакет санкции против Москва ќе биде исклучително тежок… Многу сме блиску до достигнување на нашите граници. Што ќе вклучува седмиот пакет? – прашува дипломатот.

Земјите-членки на ЕУ не успеаја да се договорат за предлозите за забрана на увоз на руска нафта, по повеќе од 10 дена разговори, при што Унгарија ја предводи групата земји кои се спротивставија на мерката. Планираното ембарго на руската сурова нафта беше дел од шестиот пакет санкции, предложен на 4 мај, поради конфликтот во Украина.

Земјите кои се многу зависни од руската нафта, вклучувајќи ги Унгарија, Чешка, Словачка и Бугарија, постојано ги изразија своите приговори за забраната. Унгарската влада вели дека ембаргото ќе ѝ нанесе осакатувачки удар на економијата.

Дипломатот за Еурактив изјави и дека иако има напредок во разговорите со Унгарија во врска со нејзиното вето на предлогот на Европа за ембарго на руската нафта, атмосферата покажа дека „ние дури и направивме чекор назад“.

Тој рече дека ставот на унгарскиот премиер Виктор Орбан по ова прашање ги става другите влади во тешка позиција. Ако Будимпешта го добие она што го сака, ќе биде тешко за другите, како што е Бугарија, да им објаснат на своите граѓани дома зошто не добиле слични отстапки.