Крушево атрактивен за планински туризам

Крушево располага со големи потенцијали за планински велосипедизам и ќе се градат патеки, констатираа швајцарските експерти кои овие денови ги посетија и ги анализираа терените околу Крушево за развојот на планинскиот велосипедизам и привлекувањето туристи со оваа нова атракција по параглајдерството што ќе ја потполни понудата за алтернативниот туризам.

Крушево ќе ги добие патеките за планински велосипедизам по експертизата на швајцарските експерти и по изработката на нивниот мастерплан. Крушевските угостители очекуваа дека првите патеки ќе бидат изградени кон крајот на август.

Ова е проект поддржан од Швајцарската амбасада во соработка со крушевските угостители, поточно менаџментот на хотелот „Панорама“. Попладнево во Крушево беа промовирани заклучоците на швајцарските експерти и очекувањата на угостителите кои сакаат Крушево, освен со параглајдерството, да го промовираат и како место за планински велосипедизам.

Oсвен во туризмот, швајцарската амбасада инвестира и во други области во земјава, како што е животната средина. Моментално се подготвува програма која ќе важи од годинава, 2021, па се до 2024 година со која Швајцарија ќе одвои 20 милиона евра за проекти од повеќе области.