Во училиштето „Ванчо Китанов“ во Пехчево ако те фатат со телефон, ќе го добиеш на 10 јуни
Донесовме одлука на наставнички совет која беше поддржана и од родителите и оттогаш, еве веќе 7-8 години, забраната функционира. Забрането е носење мобилен во училиштето! Како функционира забраната? Едноставно, ако некој биде фатен дека носи телефон, му се одзема и му се враќа на 10 јуни. Тоа го знаат и родителите и учениците. Им се кажува уште на првиот училиштен ден, споделува нашата соговорничка Магдалена
ООУ „Ванчо Китанов“ во Пехчево е мало училиште, расадник на знаење и воспитание на младите жители од Општина Пехчево. Мало, но современо училиште кое нуди пријатна и топла атмосфера и ги подготвува учениците за предизвиците што ги носи новото време. Она по што ова училиште се разликува од другите е фактот што е училиште без телефони. Учениците не смеат да имаат телефони за време на настава и оваа забрана совршено функционира со години.
За тоа што го натерало наставничкиот колегиум на оваа строга забрана на телефони, Магдалена Симовска, наставничка во „Ванчо Китанов“, ни сподели:
– По неколку злоупотреби на телефоните и типични примери за сајбер-булинг кои предизвикаа непријатности и кавги меѓу ученици, вмешување на родители и психолошко-педагошката служба во училиштето, по неколку кражби на телефони, потребата од забрана за носење телефон во училиштето сама се наметна. Донесовме одлука на наставнички совет која беше поддржана и од родителите и оттогаш, еве веќе 7-8 години, забраната функционира. Забрането е носење мобилен во училиштето! Како функционира забраната? Едноставно, ако некој биде фатен дека носи телефон, му се одзема и му се враќа на 10 јуни. Тоа го знаат и родителите и учениците. Им се кажува уште на првиот училиштен ден – вели Магдалена.
Целосна поддршка од родителите
Имало ученици што биле санкционирани и, се разбира, правило си е правило, телефонот им бил одземен и им бил вратен на 10 јуни. По неколку одземени телефони, учениците сериозно го сфатиле правилото.
ООУ „Ванчо Китанов“ е современо училиште во кое се изведува кабинетска настава. Сите училници се снабдени со електронски табли, нови столчиња и клупи, современи надгледни средства по сите предмети, библиотека која постојано се надополнува со нови наслови.
