Со пари од ТИКА ќе се гради спортска сала во Канатларци

За два месеца треба да почне изградбата на спортска сала во ОУ „Кирил и Методиј“ во Канатларци. Ова денеска го вети амбасадорката на Република Турција во Македонија, Тулин Еркал Кара при посета на ова општинско училиште.

„Навистина ми е мило што денеска сум тука и што Општина Прилеп е присутна со свој претставник од сферата на образованието. На овие ученици овде им ветив изградба на спортска сала. Овде со нас е и ректорот на Меѓународниот балкански универзитет. Тој вети дека за пет ученици ќе обезбеди целосна стипендија, за да може да студираат бесплатно на Универзитетот во Скопје. Исто така, турскиот културен центар ќе донира книги и друг наставен прибор за подобро образование на овие дечиња“, вети амбасадорката Еркал Кара.

Директорот на училиштето Бајрам Јусуфоски изрази благодарност за донациите од турската влада.

„Искрена благодарност за оваа донација, која што ќе биде остварена во населено место коешто е пример за соживот. Овде живеат и Турци и Македонци, со векови заедно, во меѓусебно разбирање и толеранција, двата јазика им се блиски на сите жители,и во училиштето се учи на двата јазика, македонски и турски, едноставно нема меѓучовечки бариери, туку соработка и поддршка“, истакна директорот Јусуфоски.

Членовите во делгацијата со амбасадорката Еркал Кара беа восхитени од населеното место Канатларци.

„Често слушав за ова прекрасно село. Тука живеат наши сонародници заедно во пријателство со Македонците и се образуваат на своите мајчини јазици.Горди сме, поради тоа. Посебно сум горд што во едно вакво населено место се негуваат традициите“, истакна Шемсетин Шекер, директор на турскиот културен центар „Јунус Емре“.

Инаку, делегацијата предводена од амбасадорката Еркал Кара денеска беше во посета и на Битола, по повод одбележувањето на 119 години од дипломирањето на Мустафа Ќемал Ататурк.

Емил Холидеј

Технички уредник, посветен на својата работа. Негова пасија се компјутерите и следење на новите технологии.

Напишете коментар

Вашата адреса за е-пошта нема да биде објавена. Задолжителните полиња се означени со *

Pin It on Pinterest

WP Facebook Auto Publish Powered By : XYZScripts.com
РАДИО ХОЛИДЕЈ